يابنت الإيه …!!!
كتبهاعلاء عيسى ، في 4 يوليو 2007 الساعة: 03:47 ص
يابنت الإيه
ياساكنة القلب والننى
باشوفك ليه 00؟
بالاقى العقل تاه منى
***
يابنت الإيه أنا رايدك
بشرع الله تشاركينى
حياتى باشوفها من بعدك
دموع عاشقة رموش عينى
باحبك بس مش عارف
باحبك ليه 00؟
***
باحبك حب خلانى
أقول للغنوة ياغنوة
تعالى قوام وبتجينى
بلاقى الغنوة مكتوبة
بتطلع منى مكتوبة
كأنى الشعر من دمى وتكوينى
***
باحبك حب فوق ماالعقل يتصور
ولو حبك جميع الناس
أنا قلبى ح يديلك حنان أكتر
دا حبك دم فى عروقى
ومش ممكن حييجى
وقت من قلبى ويتغير
***
باحبك حب فاق الوصف والموصوف
باحبك حب مش عادى ولا مألوف
باحبك حب لو حسه السكات ينطق
باحبك حب لو حسه الجنين يعشق
باحبك بس مش عارف
باحبك ليه 00؟
يابنت الإيه
باحبك نفسى اقولها لك
بالاقى الكلمة بتسافر ومش قادر
أجمعها ولا انطقها
باحبك سكة وخدانى وبالقانى
رضيت مارضتشى بامشيها وباعشقها
***
باحب الشال على كتفك
باحب السكة من مشيك
باحب الكحلة فى عينيكى
باحب الحنة فى ايديكى
باحبك كل ما فيكى
باحبك 00بس مش عارف
بحبك ليه
يابنت الإيه
ـــــــــــــــــــــــــــــــــــــــــــــــــــــــــ
التصنيفات : الشعر | السمات:الشعر
أرسل الإدراج | دوّن الإدراج
يوليو 4th, 2007 at 4 يوليو 2007 11:57 ص
مدونة جيدة بالتوفيق
يوليو 4th, 2007 at 4 يوليو 2007 6:57 م
مبروك على المدونة
أيها الشاعر الساخر حتى النخاع
مدونة جميل
وأتمنى أن تدعمها بقصائد جديدة دوما
فأنت لديك الكثير
العربى عبدالوهاب
يوليو 4th, 2007 at 4 يوليو 2007 11:12 م
قصيده جميله واتمنالك مزيد من التقدم
يوليو 4th, 2007 at 4 يوليو 2007 11:16 م
مبروك على هذه المدونة الجميلة
يوليو 5th, 2008 at 5 يوليو 2008 11:11 ص
يا بنت الايه
قصيدة غنائية
نحلق فيها معك مع الجمال
والحقيقة ما قلت
باحبك بس مش عارف بحبك ليه
هو ده الحب