وقالت …. لى …
كتبهاعلاء عيسى ، في 4 يوليو 2007 الساعة: 03:55 ص
سيب لى فرصة
لما اراجع فيها نفسى
واوعدك هاخد قرار
واللى بينَّا نأجله لبعد القرار
***
طول ما حاسّه الدنيا شايفاها بعينيك
وان رحلة عمرى خطوتها بإيديك
وان تغيب عن بالى لحظه بانشغل عنَّك وبيك
وامَّا اشوفك بانسى روحى ونفسى فيك
يبقى دا مش حب لا
يبقى دا إسمه انتحار
سيب لى فرصة
لما آراجع فيها نفسى
واوعدك هاخد قرار
***
وان عرفت أخبى طيفك عن عيونى
وان لقيت النوم بدأ يعرف جفونى
وان عرفت أخطى خطوة ف رحلتى وانت بعيد
وان قدرت ابدأ حياتى تانى بعدك من جديد
يبقى كان إحساسى بيك
مش حب لكن
كان مجرد انبهار
سيب لى فرصة
لما اراجع فيها نفسى
واوعدك هاخد قرار
***
وانت حاول لوهاشوفك
دارى نفسك
إوعى عينى تروح لعينك
وان جابولى بصدفة سيرتك
هانشغل عنّك بغيرك
وان لقيت
م الصعب قلبى ينسى حبك
يبقى حقك لاعتذار
ح اعتذرلك وآجى اقول لك
حبى لك آخر قرار
ـــــــــــــــــــــــــــــــــــــــــــــــــــــــــ
التصنيفات : الشعر | السمات:الشعر
أرسل الإدراج | دوّن الإدراج
