واحد ….. واخد …. على خاطره
كتبهاعلاء عيسى ، في 22 يوليو 2007 الساعة: 22:49 م
واحد واخد على خاطره
واحد واخد على خاطره
أنا واخد على خاطرى كتير منك -
مانا منك
ومهما ابعد فى يوم عنك ..
باتوه فى السكه واشتاق لك
باحس بحاجه جوايا بتندهلى
وباسمع لك
وبارجع لك ..
واقول منك
وبحلم إنى بين حضنك
كأنى حته من حضنك
ولّما احزن ..!
بلاقى الحزن جاى ...
...مِّنك
ولّما افرح ..!
بلاقى الفرح دا ... ..مِّنك
خلاصة كل شئ ...... مِّنك
م انا مِّنك ،
وغصبٍ عنى أو عنك...أنا منك
رضيتى ما رضيتيش .. منك
رضيت ما رضيتشى انا ... منك
عموماً ...
كل شئ قسمه
وقسمة قلبى إنى اشعر وانا فْ حضنك
ببرد شديد
وتدى حضنك الدافى
لقلب الغير
وانا اللى قلبى كان مخلص ماليه الخير
أنا الطيب يا ست الناس
مش الشرير !
أنا الشمعه اللى قادتلك طريقك نور .
وانا اللى وعدى كان ليكى صريح جداً
وكان على نور
وفى الآخر ..
أنا الغلطان !
عشان باوعد وكان وعدى على أدى
أكون غلطان ؟
عشان الصدق كان ردى
أكون غلطان ؟
عشان ما قدرتش ازرعلك جناين كدب
مرويه بأحلى كلام
عشان ما عرفتش ابنيلك
قصور جدرانها م الأوهام
عشان ما رضيتشى أتجمل
ولا اتحمِّل
أشوف الحب متعزب
خيوطه دايبه فى الأحلام
أكون غلطان ؟
عموماً ..
كل شئ قسمه
وانا القسمه ..
أكون عايش قصاد مِّنك أنا الظالم
واكون عايش وحيد واغرق
فى بحر هموم
وانا المظلوم
رفضت انى أشوف الورده دبلانه ...
فْ جناين شوك .
محبتشى تعيش النسمه بردانه
فى ليل ضلمه ونهار مخنوق .
بحق الله أنا المظلوم
بحق الملك والملكوت
أنا المظلوم !
باكون عايش على أرضك ..
واشوف خيرك ...
... واموت محروم !
دانا أصعب قرار عندى ..
أكون عايش بعيد عنك
وأتنفس هوا بايت
ماهوش منك
بعيد عنك ..
أنا عايش كما الميت
بَـ اعِد الساعه بالثانيه عشان تِخلَصْ
باقول للعمر يالله اخلَصْ
ولا بْيخلَصْ
كأن الوقت داينِّى ..
وبادعى انُّه فى يوم يخلَصْ
عشان أخلَصْ
مانا المخلِصْ ..
بدرت الحب حواليكى
جناين ورد بتزهَّر
بيطلع منها ريح المسك
والعنبر
وصفِّتها بشجر أخضر
رفعت الحب فوق منك سما عاليه ...
... وْمَلِتها نجوم
فى وقت الضلمه بتنور
وكنتى انتى الدفا والبرد
وكنتى انتى فْ صلاتى الفرض
وكنتى انتى لقلبى الأرض
بقيتى انتى الوطن ليا .
ومين يقدر يخون وطنه ؟
عموماً ..
كل شئ قسمه
وقسمة قلبى إنى افضل
مجرد كلمه فى حكايه
وقسمة قلبى إنى احزن
وامّوت حزنى جوايا
وجايا تقولى دلوقتى
لولاكى انتى ..
ما كنت فْ يوم هاكون شاعر!
ولا هابقى مابين الناس
أنا الشاعر !
وإيه يعنى ...
م انا منك
وكل كلامى كان ليكى
... وكان منك
هاتيلى حد فى مكانى يشوفك زى ماشفتك
ولا يتوهشى فى لون عينك ويتغرب
ويتعذب
ولا يكتب ؟
عموماً ..
كل شئ قسمه
وقسمة قلبى إنى ابقى قصاد عينك
أنا المذنب ... !
وانا اللى فتحت لك قلبى
وسكنتك
وانا اللى عنيِّه مالِتلك
وعدِّتلك
وعاهدتك بطول العمر إنى اخلص
م انا المخلص
ركبت المركبه بيكى ومقدرتش أكون ريس
لمحت الموجه بتعافر وقصدانا تفرقنا
وبصيت لك ..
لقيت نفسى بقول نفسى أنا الأول
لابد البادى يتحمل
ويومها ..
حْلفت لك إنى هارسيكى
لقيت الموجه بتعافر وقصدانا تغرقنا
رميتك بره مركبتى لأبعد شط
وكان بينى وبينك خط
قطعت الخط بإديه وخدتى قلبى وياكى
وكان قصدى أعديكى
وأفديكى
وكان فى النيه إنى اغرق
وانجيكى
ماكنشى القصد اكون البادى فى عذابك
ياريت السهم كان صابنى ...
...ولا صابك
عموماً ..
كل شئ قسمه
وقسمة قلبى إنى افضل قصاد عينك
أنا الجانى
قوليلى ازاى
إيديه ازاى تكون قاتله ؟
إيديه دى اللى كانت لك
فى وقت البرد تتنفس هوا بارد
ويطلع صهد فوق إيدك
يسيبنى ويمشى فى وريدك
ويرسم لك حمار خدك
ووقت الحر تتنفس هوا ساخن
وتعرق تلج فوق إيدك
يدوب ويمشى فى وريدك
ويبقى نسمه بتهفهف على شعرك
عموماً ..
كل شئ قسمه
وبالقسمه ..
تكون إيدى قصاد منك ..
إيدين قاتله
وتبقى عيونى قدامك ..
عيون قاسيه
قوليلى ازاى تكون قاسيه ؟
عينيه دى اللى عاشت لك
تشوف الناس فى أوصافك
وأوصافك فى كل الناس
ولا مره وحشها الناس ..
وهى واقفه قدامك
ولا مره فارقتيها ..
وهى شايفه كل الناس
قوليلى ازاى تحس الناس ..
وكنتى انتى البياض والننى ...
وِالْجفن اللى حاويها ؟
قوليلى ازاى تفارقيها ..
وكنتى انتى الشعاع ليها ؟
عموماً ..
كل شئ قسمه
وبالقسمه ..
تكون عينى قصاد مِّنك
عيون قاسيه
ويبقى لسانى قدامك
لسان أخرس
قوليلى ازاى ؟
لسانى ازاى بقى أخرس
لسانى دا اللى كان أول ماكان ينطق ويتعلم
بيتهجى حروف اسمك ؟
وكان بيسمى كل الناس على اسمك !
وفى الآخر أنا الخاين !
وانا الجانى وانا المجرم وانا الظالم !
ياريتنى كنت ...
ماكنتش
ياريت قلبى اللى كان حبك
يكون قاسى ولا يدقش
دانا باسمع تقولى الآه
بتتردد فى قلبى آهات
ولّما القى صراخ بيكى
بيتحول فى ثانيه سكات
وفى الأخر..
أنا اللى خلفت لك ظنك ؟
أنا اللى عاش بعيد عنك ...
...وانا منك !
عموماً ... كل شئ قسمه
وقسمة قلبى إنى اْخلِصْ .. ولاتحبش
وأقول حبى قليل جداً
ولا يكفَّى
وبارهن كل أيامى فدا ليكى
وأقول العمر مايكفَّى
وفى الآخر ..
باعيش فيكى كما المنفى !
وباتغرب بعيد عنك
وانا الأقرب قريب منك
عموماً ... كل شئ قسمه
وبالقسمه.. أكون مذنب ...
... واكون البادى فى عذابك !
وكل الناس تسامحيهم
وانا الواقف على بابك
عموماً ... كل شئ قسمه
وقسمة قلبى إنى ابقى
مجرد ذكرى ...
ع الهامش
وصفحه سودا ...
!!..... فى كتابك
ـــــــــــــــــــــــــــــــــــــــــــــــــــــــــ
التصنيفات : الشعر | السمات:الشعر
أرسل الإدراج | دوّن الإدراج
يوليو 23rd, 2007 at 23 يوليو 2007 11:55 ص
الله الرحمن الرحيم
السلام عليكم ورحمة الله وبركاته……
الاخ عز الدين كمال…..رزقك ا لله من فضله ورفع درجاتك
فى الداريين.والمسلمين…………..
جزاك الله على الزيارة وعلى التعليق”للمبادرة الايجابية”
جزاك لله على قبولك اقتراحى ….
هكذا نرتقى للافضل………….
معا نساهم فى التنمية فى عالم التدوين ……….بدورى مبتدئة ومية فى مجال لغة العصر
ارجو لك التوفيق والسداد
ادعوك لمشاهدة “دعوة للتعايش”لعمرو خالد
يوليو 23rd, 2007 at 23 يوليو 2007 7:33 م
الله الرحمن الرحيم
السلام عليكم ورحمة الله وبركاته……
الاخ علاء عيسى…..رزقك ا لله من فضله ورفع درجاتك
فى الداريين.والمسلمين…………..
جزاك الله على الزيارة وعلى التعليق”للمبادرة الايجابية” وعلى تنبيهك لى لخطئى ا لغير المقصود………………..
معذرة…………..
ارجو لك التوفيق والسداد……………..
اهدى لك هذا الموقع لتزين مدونتك=
http://www.arabsys.net/pic/
يوليو 24th, 2007 at 24 يوليو 2007 9:31 ص
في 24,تموز,2007 - 07:31 صباحاً, حسن توفيق كتبها …
اااااااااااااااااااااااااسف
تعليقى خارج النص ولكنه اهم
للمرة الثانية رسوم مسيئة للرسول صلى الله عليه وسلم
هذه المرة فى السويد
برجاء الاطلاع وعمل ما يحفظ كرامتنا و حقنا فى الدفاع
عن رسولنا الكريم صلى الله عليه وسلم
يوليو 26th, 2007 at 26 يوليو 2007 11:12 م
حلو ولو ان فيها كلمات غير شاعريه نوعا ما ولكن مشكور على المجهود
يوليو 26th, 2007 at 26 يوليو 2007 11:16 م
شكرا لزيارتك
وأتمنى أن تجدى الشاعرية فى مناطق أخرى وقصائد أخرى
يوليو 30th, 2007 at 30 يوليو 2007 11:47 م
وفاء أحمد
مشكورة سيدتى
على زيارتك
وجزاكم الله كل الخير
أغسطس 5th, 2007 at 5 أغسطس 2007 8:27 م
علاء ايها الراقي
جميل ما قراته هنا
محمل باحاااسيس راقيه واسلوب بغاايه الجمال
راقني ان اقرأك هنا
والعاميه طلعت جناان والله
مرسي لإلك